Irisflotta.com

laugardagur, ágúst 23, 2003

Fyrsta vikan í vinnunni var vissulega erfið, en mjög skemmtileg. Líst rosalega vel á skólann minn og samstarfsfólkið líka. Það er svo skrítið hvað það er til mikið af skemmtilegu fólki í heiminum með ótrúlega svipaðan þankagang og maður sjálfur, en samt skapandi og hresst. Var svo heppin að fá frábæran samkennara. Sönn Guðsgjöf. Hún er búin að vera að fill me in on the 8th graders. Hitti krakkana svo í fyrsta sinn næsta mánudag, læt ykkur vita þá hvort þetta líti enn jafn vel út. Svo förum við með krakkana í smá óvissu á miðvikudag.

Boltinn að rúlla á fullu. Tímabilið fer að ná hámarki. Þrír leikir eftir, Blikar á þriðjudag, Norðurbandalagið á laugardag og FH á miðvikudeginum þar á eftir. Ætlum okkur að taka þetta. Hef fulla trú á stelpunum. Margt búið að ganga á að undanförnu, en það sem drepur mann ekki gerir mann sterkari, það er alveg ljóst. Það er aldrei meira á mann lagt en maður þolir. Þótt ég hafi stundum efast um þá fullyrðingu. Frábær grillveisla í vikunni í villu í Firðinum. Sexy Ass fær plús í kladdann fyrir gott frumkvæði og kokkurinn líka fyrir snilldarkjúlla.

Er svo í þremur fögum í Kennó og var alveg að fara yfir um af stressi í vikunni, huxandi um allt sem koma skal. En þetta reddast alltaf einhvern veginn og þá er fínt að hafa netnörd eins og Mist sem er afslappaðri en allt þegar kemur að námi til að halla sér að.

Helgin búin að fara þokkalega í að ná sér eftir stress vikunnar. Hvernig fer stress.is að? Skil ekki hvernig hægt er að lifa í svona endalausu stressi.

Tók líka út rifrildi mín fyrir allt árið í síðustu viku. Aumingjans mennirnir sem urðu fyrir barðinu á mér, en maður lætur ekki vaða yfir sig. Stundum þarf maður bara að svara hraustlega fyrir sig og hana nú. Sleppi því alfarið að segja hverjir lentu í mér en ég myndi svo sannarlega ekki vilja lenda í mér í þannig ham, svo passið ykkur bara. Stolt að segja þó að ég hafi ekki sagt eitt einasta blótsyrði í þessum rifrildum, sem er jú eitt af mínum markmiðum í lífinu... þ.e. að blóta ekki...

Hrós dagsins: Maríubaugshjónin fyrir að þrífa allt hátt og lágt í sameiningu í dag og Ingi frændi sem átti afmæli 20. ágúst og heldur upp á það á morgun. Til hamingju frændi minn.

fimmtudagur, ágúst 14, 2003

Þá er stelpan sest á skólabekk aftur. Tek einhver 2-4 fög í fjarnámi Kennó þessa önnina ásamt því að kenna trylltum unglingum í Borgaskóla 30 tíma á viku. Það verður víst nóg að gera í vetur. En það er bara gaman.

Töpuðum stórt á móti Val í gær. Söknuðum Jónu, Ásdísar og GunnIngu úr byrjunarliðinu frá því síðast. En við erum enn á lífi í þessu. Þurfum bara að vinna Þór/KA/KS fyrir norðan sem við ætlum þvílíkt að gera. Mjög skrítið að koma í Valsheimilið og leika þar sem gestur eftir að hafa átt næstum því heima að Hlíðarenda í einhver 15 ár. Margar mjög efnilegar stúlkur hjá þessu félagi. Þær standa sig eflaust vel í framtíðinni.

Við skjaldbökurnar inná vellinum föttuðum endanlega að við höfum ekki alveg hraðann á við þessar 17 ára landsliðskonur. Spurning um að finna flotta hillu fyrir skóna eftir tímabil. Annars er best að vera ekki með alltof miklar yfirlýsingar. Maður klárar bara tímabilið með stæl og sér svo til.

Frí á æfingu í kvöld. Bara nokkuð sátt við það.

Hrós dagsins: Veigur sjúkraþjálfari sem var að eignast rúmlega 15 marka og 55 cm snáða í morgun. Til hamingju Veigur og frú!!!

miðvikudagur, ágúst 13, 2003

Var að taka rúnt á bloggsíður vinanna og komst að því að fleiri en ég hafa verið latir við tölvuna í sumar. Nú skal þó heldur betur bætt úr því. Rútínan að fara í gang aftur með látum. Byrja í fjarnámi Kennó á fimmtudag og að vinna á föstudag. Fyrir vinnuvalinu varð Borgaskóli í Grafarvogi. Þar mun ég verða enskukennari á unglingastigi. Já elsku unglingar, watch out. Hætti við íslenskukennslu og má því sletta helling á ensku, alrigthy then!!!

Sumarið er búið að standa undir hörðustu væntingum og vel það. Fyrir utan fótbolta öll kvöld nema sjö í sumar þá hefur ýmislegt verið brallað. Húsmæðraorlof á Akureyri með tveimur skjaldbökum stendur þó aldeilis uppúr ásamt góðum rúnti, Vestmannaeyjarferð og ferð í Skvísusund, slatta af fótboltaleikjum, Flúðaferð, Þjórsárdalsferð, golfi, línuskautum, brenndrar húðar í sundi og öllu hinu skemmtilega dótinu.

Krúttin mín í Þraukurunum hafa verið að bæta sig stanslaust í allt sumar. Ég hef fulla trú á þessu liði og við munum standa stoltar eftir tímabilið, ekki spurning.

Stelpan loks komin með almennilega tengingu heim (eftir að hafa fattað að stinga í samband) og því verður bloggað feitt næstu daga-:)

Hrós dagsins: Ægissíðan fyrir að skarta sínu fegursta þegar ég og Thelma uppáhaldsfrænka fórum á línuskauta í dag.